東方日報C1:郭富城舞出王者功架:冇咁易退休!
2024年08月15日 03:01
東網電視
更多新聞短片
![](/hk/bkn/cnt/entertainment/20240815/photo/bkn-20240815030111593-0815_00862_001_01p.jpg?20240815030111)
等足8年的郭富城紅館演唱會開鑼,終見證他練舞700小時的成果外,其半億打造的百變舞台首度曝光,除有橫跨紅館的180度視野長幕牆外,方塊凱旋門機關啟動後,魔幻「AK 城堡」空降台上,在舞壇新秀爭上位下,頭戴皇冠的城城仍然穩坐「舞台王者」寶座,他在騷上說:「我咁鍾意舞台唔會咁易退休。」
郭富城(城城)共13場《ICONIC世界巡迴演唱會2024-香港站》前晚在紅館舉行首場,全場爆滿,一直保持神秘的半億舞台終見真身,三面台上,中間以高度頂上天花板的巨型LED為主螢幕,左右兩邊再加兩個大螢幕,打造成一幅視野達180度的長幕牆,令場內每個角落的觀眾都欣賞到城城演出,還有能時開時合的方塊凱旋門機關,加上燈光投射,營造出千變萬化的視覺效果。
至於最令全場嘩然的則是台上突然空降「AK(Aaron Kwok)城堡」,而戴上皇冠的城城就坐在立體城堡中的寶座上,在17位舞者的伴舞下獻唱《國王的新歌》,盡顯王者本色。之後在半空的舞台上,跟一批又一批的舞蹈員跳唱經典快歌,緊接「AK城堡」登陸台上,城城再獨佔另一升高了的小型舞台跟12位舞者鬥舞,最後沿斜台滑落主舞台。而唱《純真傳說》時,城城更技高人膽大用白眼罩蒙眼,於升降高台上又唱又跪地,台下觀眾也戥「離地」的他感牙煙。
潑墨畫送驚喜
城城亦在騷上展現其能文能「舞」的一面,邊唱《飛》邊在台上即席揮毫,先用拐杖在畫紙上畫上第一筆,再用綠及藍色油彩潑墨,不消幾分鐘就完成抽象作品,最後大筆一揮簽名作結,破天荒的「文藝表演」令觀眾相當驚喜。近年愛上畫畫及寫字的他表示經歷足不出戶的疫情,令他愛上線條優美的中國及西洋畫:「正值疫情時,我做唔到自己嘅創作,換咗另一啲創作,啱啱喺大螢幕上有啲畫面、圖案就係我畫,係記載住我2024年8月13日喺紅館同大家分享我嘅作品,我希望將來有機會同大家分享到我一啲畫作,一樣都係我創作,四合作一,歌、舞、字、畫,好唔好?」
除即場作潑墨畫外,城城首唱為歌迷而創作的新歌《您》時,大螢幕上出現共30幅由他創作的書法,今年正是他踏足紅館30周年,他表示:「代表咗我對每位歌迷,喺呢30年嘅紀念同印記,希望永遠留喺我心裏面同工作室裏面,當有日見唔到你哋,我會攞呢啲字畫出嚟去感受你哋,每幅字畫裏面嘅『您』字係代表1年,有30張代表30年,希望我老咗,喺舞台上無法表演時,呢啲就係我最好嘅回憶。」
而個唱開始時,現年58歲、跳足40年舞的城城提及退休問題,指個唱原本名為《ICONIC EXIT》,但開會時擔心產生誤會才作修改,他說:「同事話有一個標誌性出口,怕誤會我要退休,我咁鍾意舞台唔會咁易退休。」他又突然變感性,指自己隨時「喊得出」,但礙於情緒管理,會將動力和感情放在作品中,更指其作品包含血與汗及感情,自問:「唔識表達,有時好直得罪人都唔知,但唔緊要,歌迷支持我就得,當然除咗我家人,包括太太同兩個女,8年前同佢結婚,當時我仲係小伙子,依家已經唔同,成熟同沉穩咗,係一個丈夫同爸爸,會繼續學習,繼續同大家表演。」唱出《愛是全奉獻》感激家人。個唱結束前,他邀請全體舞者齊跟觀眾做出個唱主題曲《EXIT》手勢及萬人人浪,再度炒熱全場。
更多新聞,請瀏覽東方日報網頁: