江若琳官司完結雨過天晴 感謝昔日的熱血和勇敢
2024年08月15日 19:01
東網電視
更多新聞短片
![](/hk/bkn/cnt/entertainment/20240815/photo/bkn-20240815190126904-0815_00862_001_01p.jpg?20240815190126)
歌手江若琳(Elanne)到新城廣播接受昆頓主持的《說故事的人》錄音訪問,與前經理人公司的合約糾紛官司終於完結,回復自由身的Elanne,相隔7年再次以歌手身分推出新歌《一直留在心底的事》藉以訴說自己的心聲。Elanne指以往因身不由己,很多時要被迫放棄唱歌向另一方面發展,雖然有工作已感到快樂,但內心仍是十分熱愛唱歌:「以前有好多遺憾,因為矛盾或者為生活,好多次被迫放棄唱歌,要過五關斬六將先唱到我要唱嘅歌,依家既然所有嘢(官司)已經完結咗,雨過天晴,我好想為自己活一次。」
而選擇再出歌,有部份原因是因為1歲的寶貝仔蕭立鈞(Owen),Elanne說:「我個仔好鍾意聽歌跳舞,佢好鍾意我唱歌畀佢聽,我唱兒歌,佢好似我粉絲咁,會由衷咁拍手掌,有一刻我望住佢,覺得佢大個之後,有咩令佢感到驕傲,唔通話阿媽經歷好多低潮同打咗場官司?另外就係有冇做一件令自已驕傲嘅事,我希望個仔大個,話佢聽無論遇到咩事,有夢就要去追。」
問到Elanne有甚麼說話想跟18歲的自己說?Elanne表示會感謝昔日自己的熱血和勇敢:「我會好欣賞呢個女仔,當年為工作同理想5日唔瞓覺,係冰天雪地,零下唔知幾多度跳落污水拍戲,仲要淋雨十幾個鐘,都未死得,諗番都唔知點生存落嚟,依家一啲都唔捱得,唔好叫我捱夜,我頂唔住架!好佩服以前自己,為理想完全忘我,又好傻咁,爭取一份正確嘅事,行一條好艱辛的路,唔知哪來嘅勇氣。」