容祖兒大開食戒　「有肥同當」預埋阿Sa

樂壇天后容祖兒（Joey）共12場澳門演唱會已完成了8場，趁本月17日再開騷前，她決定放肆一下，暫時拋開「減肥為女人終身事業」的信念，在社交網上載返港後大歎沙冰的短片，見她面前除擺了一杯飲品外，還有一大杯雪糕沙冰，分量之大勁過其上圍Cup數，而她的表情亦相當趣致，除開心到口擘擘外，眼定定睇實冰凍甜品，又忍不住咀舔舔，似乎想一啖就鯨吞整杯沙冰，她更自我催眠指沙冰不致肥，留言謂：「減肥雪糕之後又一力作，減肥冰沙。」其實沙冰的熱量分分鐘比汽水還要高，加上她面前的沙冰加了雪糕及忌廉，相信卡路里不會低。

祖兒如此斗膽「大開食戒」，未知是否因身邊有「有肥同當」的夥伴有關呢？原來她口中的「忙到抽筋都要見一面嘅甜心閨蜜一枚」正是蔡卓妍（阿Sa），見跟她同坐的阿Sa亦相當猴擒，未有理Joey似想合照，獨自大食了一口沙冰，阿Sa還留言附和Joey沙冰低脂：「冰即是水，水即是冰！飲水之嘛。」但兩人的經理人直指解釋即是掩飾：「趁我唔喺香港就作反！」