衛詩雅籌備婚禮感疲累　Gin Lee準備接花球

藝人李幸倪、衛詩雅、溫碧霞、黃明德，今日在英皇老闆楊受成率領下到銅鑼灣出席0 e:ffect Concept Store開幕活動。本月26日生日的Gin Lee，已安排了特別的慶祝活動給自己，就是到台灣上一個動物傳心術課程，想跟自己的愛貓好好溝通，「佢年紀大，身體有小毛病，想知佢嘅需要，都可以幫吓同事嘅寵物。」笑言將來或可能成為第二份職業。衛詩雅（Michelle)原來亦有學過動物傳心術，都是為了與屋企貓狗好好溝通。

正在籌備婚禮的Michelle表示終於明白婚禮有很多事忙，令她非常疲累，婚事已搞得七七八八，「婚宴日子和行禮日子已定喺明年2月舉行，試咗裙掛，但未試婚紗。」Gin Lee即場自焉在婚禮上唱歌，又會準備人情，認真老友，Michelle笑言：「我會拋花球畀你。」問幾時輪到Gin Lee嫁，她表示暫時只想努力工作。

提到Michelle早前上譚玉瑛（阿譚）的電台節目，遭阿譚踢爆她曾帶前度出席派對勁尷尬，Michelle表示每次直播都會有講錯說話，認為今次屬少誤會，不過當日駕車回家驚到震，笑言現在提起也緊張流汗，認為每個人都有過去，相信未婚夫會理解，所以覺得感情事應該低調，Gin Lee表示認同會謹記。

同場，溫碧霞（Irene）和歐陽震華同是7月壽星，Irene透露生日與屋企人去峇里旅行慶生，平日工作忙碌少時間陪家人，想趁暑假多陪老公及兒子，之後會再去日本玩，不太擔心日本地震，深信命運認為一切自有安排，Irene透露今年生日特別開心，因對主演的電影《謊島美人魚》好滿意，自評有8、90分，她與歐陽震華從未合作，自他加盟英皇後，也希望有機會合作，歐陽震華笑言可以做Irene的哥哥或者爸爸，笑言：「嗰時宣萱和滕麗名問我幾時再合作，我話佢哋可以做我後母，後母同大仔感情通常都好好。」

今日Irene以大deep V上陣，問歐陽震華會否不敢直視，他爆以前宣萱出席無綫台慶時，穿上攞命晚裝，由於他與宣萱相熟，甚至要求宣萱停低讓他看兩秒，他得戚地說：「有時宣萱會主動叫我望㗎！如果畀女人知你偷望佢，就畀人覺得咸濕和猥瑣，男人望女人係出於好奇，女人都會望小鮮肉一樣。」Irene也表示不介意被人望，認為應一齊欣賞。歐陽震華生日沒有特別慶祝，擔心外面多病毒，待太太8月5日生日才一次過食飯慶祝。

提到《法證先鋒VI：倖存者的救贖》在內地率先播，遭到內地網民批評，歐陽震華是法證先鋒的「先鋒」，亦有捧場看，並撐劇集「一致好評」，他表示：「法證1、2、3集都好成功，可能觀眾入曬腦，好似周潤發做完許文強，如果再拍續集係好難，觀眾會雞蛋挑骨頭，我就覺得今集無論攝影、道具和服裝都好靚，（網民批評感情戲過多？）我嗰時都同蒙嘉慧有感情戲，不過查案比例係多啲，依家播咗幾集啫，遲啲可能會查案多番啲。」