吳忻熹乳癌復發 公開化療日記:極辛苦唔知點捱落去
2024年08月18日 16:31
東網電視
更多新聞短片
![](/hk/bkn/cnt/entertainment/20240818/photo/bkn-20240818163120069-0818_00862_001_01p.jpg?20240818235957)
1998年香港小姐季軍吳忻熹(前名:吳文忻),自2011年下嫁「南丫島王子」陳劍陵後,育有2女,淡出幕前,專心相夫教女。她日前透露自己2年前確診乳癌,今年不幸復發,更已經是第三期,並擴散至淋巴腺。她早前於社交網上載接受化療時的自拍照,由於受副作用影響,身形明顯消瘦不少,她坦言一度有「在家中等死」的感覺,但向來樂觀的她,不忘鼓勵自己要活下去。
她今日(18日)再拍片出Po,透露治療經過,片中她聲線氣若柔絲,沒有氣力說話,更兩度喪咳,狀甚辛苦,她表示做完第一次化療極度辛苦:「前所未有感到成個世界好似唔係自己咁,成身周身骨痛,我冇話冇胃口同埋嘔嗰啲,因為我都食好多supplement,但係就feel到成個身體『冧偈』,心諗點樣可以捱落去。」
她並寫下長文,分享抗癌日記,原來她目前已接受2次化療,她表示即將要剃頭髮,未來要接受手術、化療、免疫治療,將會持續半年至一年,網民都紛紛留言為她打氣,希望她可以早日康復。
吳忻熹紀錄自己接受治療過程,全文如下:
6/8/2024
今天開始我人生的第一次化療和免疫治療,將會是一個漫長的旅程,這個旅程是辛苦的,有幾辛苦,是值得唔值得,等我一一記錄下來。今日吊針由一點調到六點。中途血壓高度185,護士要停藥吊住鹽水先,過咗大半個鐘頭再驗血壓落返143先再繼續,有點兒嚇親我!今日第一日第一個Cycle身體反應感覺良好,沒有之前人們講的恐怖。但人們都說最恐怖的是第三個cycle之後,當白血球跌到好低嘅時候是最辛苦的,所以不敢太樂觀!
7/8/2024
今日化療之後嘅第二日,感覺OK ! 仲可以去車個女去學跳舞。去買定啲嘢返屋企煑!sigh…… 今個月工人放成個月假!好彩多得啲朋友幫手,我要去吊針嘅時候就放兩個女去朋友屋企同朋友嘅女玩,又幫我買咗好多幫助我恢復身體體力嘅食材!感恩!🙏
8/8/2024-11/8/2024
攰到想死,全新周身骨痛,講嘢又氣喘,一直攤喺床,好辛苦,冇心機,心諗點樣可以捱落去,仲有漫長嘅路,好朋友彭秀慧,分享了她表姨甥在她的社交平台之前接受化療的每日進程,自己想了一會,覺得自己也應該這樣做。因為我總不能夠每日都攤喺床度吧!感覺很死!好像在等死!分享每日煮啲乜嘢畀自己食,有啲咩係應該要在化療期間食和飲,分享比同路人,也是一件好事。另外因為之前把自己收埋了一段時間,而我這個星期開始陸陸續續有話畀朋友聽我cancer的事,每日都收到很多問候的message,雖然很窩心,但是在我全身周身骨痛,攰到想死的時候,要逐一回覆也是一件很累的事,如果可以在我的社交平台比關心我的朋友看見我每天在做甚麼,接受他們的支持,也幫到自己去努力打呢場漫長的仗!不是很好嗎?起碼逼到自己每日去做一點事,有點存在價值,感覺也會好些!
12/8/2024
接受第二次化療前的一日,晨早要去醫院抽血,下午接受訪問。
13/8/2024
第二次化療,今次淨係吊一隻藥叫紫杉醇,吊完超……….攰,坐的士回程中,我忍不住攤了在座位上,嚇親的士司機,問我有冇事。不好意思!😅😔
14-17/8/2024
有時精神,有時候又突然好攰,仲未開始甩頭髮🙏😅!
明白其他傳媒朋友想同我做專訪講吓感受,但我現在真係需要很多嘅休息和調理,所以決定只做了一次專訪公開事情,跟着專注處理自己身體,希望各傳媒朋友明白!🙏
我會趁有精神嘅時候,會拍定片同大家share,我每日食啲咩,煲啲咩畀自己去飲同補充體力,同講吓感受,有興趣睇同支持我嘅話就follow我啦!☺️☺️因為你哋每一句支持嘅留言,對我都有好大嘅正能量推動力!感恩!🙏😘