黃宗澤彈蔡潔出浴冇嘢睇 嗌開節目搵郭珮文着三點式
2024年08月18日 19:20
東網電視
更多新聞短片
![](/hk/bkn/cnt/entertainment/20240818/photo/bkn-20240818192033268-0818_00862_001_01p.jpg?20240818231700)
藝人黃宗澤(Bosco)、蔡潔、袁偉豪、傅嘉莉及戴祖儀等,下午現身油塘,出席無綫熱播劇《法證先鋒VI:倖存者的救贖》宣傳。席間蔡潔初試啼聲獻唱劇集歌曲,事前更搞笑形容當刻心情「驚到瀨屎」,滿堂爆笑,而Bosco則被爆經常煲老火靚湯到片場萬歲,相當好客。
受訪時Bosco談到劇情交代他於日本「瘋癲尋妻」即坦言:「第一集就唔見咗個老婆,跟住我就全部對住空氣演戲,尤其有一場企喺露台度喊,要不停keep住個狀態及情緒,連貫二十幾集真係好攰。拍咗咁耐戲,呢次都算有難度嘞!」至於「太太」王敏奕遺下「細佬」馮皓揚交由他照顧,Bosco對患有亞氏保加症的馮皓揚讚口不絕:「細佬幾可愛又好玩㗎,覺得佢好啱做演員,起初都有啲擔心大家嘅交流,點知去到片場佢係嗰個狀態。」
蔡潔上輯險被關楚耀「生劏」,本輯關楚耀以另一身份回歸,蔡潔預告二人將有感情線:「我仲因疑似殺咗佢而坐監。今次我哋鐵三角(連同Bosco及袁偉豪)都帶住沉重嘅心情演戲,所以收工都想去食吓好嘢放鬆,多謝Bosco嘅住家湯,佢會因應時節煲唔同嘅湯。」Bosco補充自己一早準備湯料北上開工時「勞軍」:「因為知道大家辛苦嘛。」
談到日前蔡潔的一場出浴戲碼,Bosco竟打趣:「本來我都想留低睇㗎,點知佢話俾我聽,只會有膊頭同腳,咁我咪話冇嘢囉,哈哈!都唔明點解上集都有大露背吖,今次導演太保守嘞。」他又忽然提議:「不如下次我哋拍《法證先鋒放暑假》,叫晒戴祖儀、郭珮文同蔡潔去海邊曬三點式,但千祈唔好預阿Bob(林盛斌)喺度搞亂檔,應該好有睇頭。」