Gin Lee自爆下年開騷　首選紅館開四面台

歌手李幸倪（Gin Lee）今日（19日）到新城電台宣傳新歌《新牌仔》，適逢本月26日為Gin Lee 37歲生日，工作人員特意預備了蛋糕為她送上驚喜，問到生日願望？她説：「希望大家都身體健康、自己多幾首冠軍歌、下年呢個時候可以喺紅館開騷。」她表示公司有計劃下年開騷，自己首選紅館開四面台。

問到生日如何慶祝？她透露已請假到台灣上堂：「同家姐學動物傳心術，養咗貓好多年，想同佢溝通得好啲。」她表示家中愛貓已13歲，因年紀大開始有小毛病，希望學好傳心術，當知到貓咪身體哪個部位感到不適，便能作出更好對應：「請咗幾日假上堂，如果順利Pass會想讀上去。（淨係上堂？）我請埋爸爸媽媽去，我同家姐日頭上堂，夜晚一齊食飯。（男友呢？）唔知佢去唔去喎，我淨係請我屋企人，哈哈！」她表示早前已跟200位粉絲慶祝生日，更講明叫大家不用送禮物，自己則預備了小禮物給粉絲。