吳謹言關冷氣開Live　熱到臉紅紅粉絲心痛

內地女星吳謹言憑《延禧攻略》中魏瓔珞一角打開知名度，之後再憑《墨雨雲間》再創人氣新高，風頭認真一時無兩。而日前（16日）迎來34歲生日嘅佢，亦開直播同粉絲一齊慶祝，只見戴上金色長捲假髮，畫上精緻妝容嘅佢，猶如精靈般美不勝收，然而當直播進行到一半時，感到異常悶熱嘅佢，亦忍唔住詢問鏡頭外嘅工作人員道：「咱們沒開空調嗎？」對工作人員則回應道：「因為大家下班了……」言下之意表示空調已經關晒，嚇到吳謹言揞嘴道：「這真的很熱，因為下班了，大樓的空調都關了。」

不過向來敬業樂業嘅佢，仍堅持完成直播，期間吳謹言熱到臉紅紅嘅模樣，亦令唔少粉絲忍唔住鬧經理公司老闆于正：「吳姐就這待遇嗎？她應該現在是于正公司的一姐了吧？」、「怎麼不給吳姐開空調？」對此，于正亦回應道：「不合道，剛剛得知，陪她過完生日就離開了。」未料于正嘅回應令粉絲更嬲道：「其他人是都不知道嗎，燈都開着呢，大熱天也不給人留個空調，不怪粉絲問一嘴。」掀起熱議。