唐治平失聯多日再蒲頭　精神恍惚惹擔憂

台灣藝人唐治平嘅73歲母親於今年6月初被發現陳屍喺住處頂樓，而一直堅稱遺體唔係母親嘅唐治平，日前終於願意指認母親遺體，並承諾處理後事。然而，似乎受母親離世打擊導致精神狀況不佳嘅佢，近日更被友人透露佢唔見手機，並失聯數日，直到日前（18日）有網友喺台北信義區見到佢，身穿藍色短T、短褲着拖鞋嘅佢，喺人來人往嘅鬧市街中搖搖晃晃咁行路，消瘦嘅身形及精神狀況絲毫未見好轉。

而自從母親離世嘅唐治平，連串行為亦令外界深感匪夷所思，當時執法部門透過身上物品及親友指認等證據，證明死者身份，但唐治平堅決唔認屍，直到喺殯儀館3度驗屍，先表示：「看起來像是我的母親。」並透露將讓母親長眠法鼓山。不過認屍2周後，唐治平母親嘅遺體唔止仍存放喺殯儀館，甚至佢本人都驚傳失聯，如今再度蒲頭嘅佢，精神狀態似乎仍然不穩定。