陳妍希懶理婚變傳聞睇演唱會　婚戒消失惹揣測

台灣女星陳妍希同陳曉近期屢傳婚變，但陳曉就一直潛水未有喺公開場合露面及回應傳聞，至於一直密密更新社交網嘅陳妍希，亦同樣選擇封口不回應。而日前再度更新社交網嘅陳妍希，則晒出自己去貴州睇演唱會嘅片段，只見身穿白色短T襯百褶短裙嘅佢，成個學生妹般青春迷人外，就連舉動都似足少女般表現雀躍，特別見到蝴蝶紋身貼紙時，陳妍希更即刻買嚟貼喺手背度，並大方晒比網友欣賞，不過缺少咗婚戒嘅手指，就意外再次掀起熱議。

至於懶理婚變傳聞，專心新劇拍攝嘅陳曉，日前亦終於迎來殺青，而有份出演兼係陳曉舊同學嘅林夏薇，亦被問道最近陳曉狀況，對此林夏薇亦透露陳曉並無異常之餘，亦都冇唔開心。