陳嘉樺新歌MV曝光　竟然撞樣鄧紫棋

台灣藝陳嘉樺（Ella），自去年參演「浪姐」第四季《乘風2023》奪冠後，人氣再創高峰。而日前出新歌《廢》嘅佢，更搵嚟導演比爾賈拍攝MV，並前往多處取景，對於各種奇特嘅拍攝角度，Ella都表示相當有興趣，其中一幕擘大口塞入鏡頭拍攝嘅畫面，Ella更豪爽道：「塞進來！」透露道：「我被穿越了，只有比爾賈導演敢這樣玩，真敢玩呀你！真的有伸過我那麼裏面的，大概就是胃鏡、大腸鏡。」而隨着Ella MV造型曝光，極具個性嘅造型驚艷唔少網友外，更有網友指佢新Look撞樣「宇宙巨肺」G.E.M.（鄧紫棋），認真又型又靚。

而為咗完美呈現出「廢」嘅主題，Ella更喺由無數個床墊堆疊出嘅柔軟空間中，以各種慵懶姿勢演繹「睡美人」外；更有化身「粉色吃貨」，喺華麗嘅餐枱上，以粉色喇叭褲造型展現獨特個性；「森林女僕」則喺陽光下展現自然清新又極具性感嘅矛盾魅力；最後喺廢衫回收場中，Ella更變成「回收Barbie」同狗演員互動，詮釋環保精神。