娛圈單打︱野男淪鴨王 選秀得啖笑
2024年08月22日 00:01
東網電視
更多新聞短片
![](/hk/bkn/cnt/entertainment/20240822/photo/bkn-20240822000115622-0822_00862_001_01p.jpg?20240822075520)
TVB Plus推出《我推的野男LIVE!》男性選美節目,一眾野男全員亮相,本來「露出胸部是常識」,不過網友就唔多認同,認為似「鴨王大賽」多啲。
查實今時今日,選美已經過晒時,每年選港姐,大家最關注都係海選時三尖八角嘅「佳麗」,到入圍着住小背心出嚟一字排開,個個「千人一面」,除非有最強Body加持,否則莫講話觀眾,相信連場務副導都未必分得清邊個打邊個。
至於選港男更加係得啖笑,有「八料冠軍港男」稱譽嘅翟威廉夠架勢堂啩,可惜大家提起佢,只係講得出佢有個舊愛叫陳庭欣,以及被麥貝夷數臭佢「性伴侶多得驚人」,喺大台行行企企13年,早前卒之離巢。
話時話,家陣香港娛圈一池死水,歌唱選秀騷至係王道,《中年好聲音3》日前經過多輪海選後,140位參賽者順利入圍,有區瑞強胞弟區瑞明,又有破吳大強紀錄、80歲高齡主婦羅秀蘭,已夠先聲奪人。
睇番一班中一生中二生嘅發展,亦一啲都唔失禮,古淖文、譚輝智、顏米羔一出道排住隊開演唱會,個個豬籠入水。最經典莫如龍婷,即使被指偷食人夫兼車廂「Hello Kiss」都繼續長搵長有,羨煞一班在大台半紅不黑等運到嘅所謂「前港姐」。
提到歌唱真人騷,ViuTV《全民造星》更加不在話下,打造出嘅頂流男團MIRROR成員唔止吸金有道,仲食女有法。
Edan呂爵安敢冒天下之大不韙偷嗒馬國女神林明禎,確係能人所不能,即使副線ERROR亦唔弱,吳保錡練跑千日用在一時,居然可以揮低吳卓羲追到Hana菊梓喬,問你服未。