歐陽妮妮傳奉子成婚　疑未夠3個月唔肯認

台灣女星歐陽妮妮同張書豪2018年因劇結緣，拍拖多年嘅2人亦終於喺6月傳出男方求婚成功嘅喜訊後，緊接着喺7月19日傳出登記結婚，猶如趕進度嘅舉動，亦引嚟外界瘋狂揣測2人係奉子成婚。

事實上，2人喺求婚、登記前張書豪就先喺社交網宣布自己戒煙，並透露自己戒煙唔係為父母、另一半或朋友，而係「為了你愛的人」：「如果戒煙其實不是為了自己，而是為了你愛的人呢？如果繼續抽，能陪伴老伴陪伴下一代的時間變少了，你也ok嗎？」並強調：「雖然我可以少愛自己一點，但我想陪愛的人久一點。」引嚟唔少網友揣測張書豪戒煙唔止為咗歐陽妮妮，同時更係為咗小朋友。此外，平時成日透過社交網同網友分享生活點滴嘅歐陽妮妮，最近亦鮮少更新社交網，最新嘅互動更係月初分享喺韓國嘅街頭穿搭，只見寬鬆打扮及明顯隆起嘅小腹，更係令唔少網友確信2人係奉子成婚，只不過礙於未夠3個月唔可以公開嘅傳統關係，所以先一直否認。