ERROR之亂︱保錡翻唱AGA古巨基歌疑情變　193打波發洩

男圑ERROR成員最近接二連三有負面新聞，先有吳保錡爆出戀上菊梓喬，但不獲女方粉絲支持之餘，保錡更被菊梓喬粉絲爆粗狂鬧；郭嘉駿（193）則因為駕駛其辣跑倒車時撞跌阿婆一事，被網友炮轟不負責任極速上車離去，更於事發超過24小時先去報案。

尋日（22日）保錡忽然上載兩首翻唱片，當中就有AGA嘅《孤雛》及古巨基嘅《必殺技》，當中《孤雛》歌詞表達孤獨、無助，更暗示愛而不得嘅遺憾，而《必殺技》歌詞就表達情侶分手後，前度一直搵番自己，似在傷口上灑鹽，兩首歌都帶負面情緒，更疑似暗示分手，令人擔心佢同菊梓喬嘅感情狀況，惹人揣測。雖然感情世界獲關注，不過佢兩首翻唱均獲兩位原唱大讚，當中古巨基留下拍掌emoji，AGA則repost佢首歌作鼓勵。

另外193則於車撞阿婆一事致缺席品牌活動後，公開自己行蹤，見佢上載現身球場打籃球嘅波鞋相，不過就未有任何留言，未有透露心情，但似乎佢生活如常，未有被事件影響，繼續出街。