Ivy So為環保出力轉食素　預告COLLAR 10月將出EP

女團COLLAR成員蘇雅琳（Ivy So）今日（23日）以露腰上衣及短褲現身品牌活動，大晒青春活力。Ivy So自認形象外向，所以夏天接了不少戶外工作，但由於天氣炎熱，早前工作時曬傷頭皮及肩膊，不過她笑言可以吸收到不少維他命D，令身體更健康。她透露最近開始轉食素，為環保出力：「我會揀某啲日子食肉，例如我同隊友生日或者同朋友聚餐想大食一餐。（有冇唔習慣？）我係慢慢轉，已經進行咗兩、三個月。不過要排舞嘅時候，怕唔夠體力，我會另外補充植物蛋白質。」

至於工作方面，Ivy So透露最近忙於灌錄新歌及排舞：「我哋一次過推出4首新歌，預計10月出EP，依家製作中。每日朝早8點排舞跟住錄音，差不多夜晚12點先收工。（拍咗MV未？）未，我唔想留香港拍，但又擔心出埠拍要好長時間，喺香港拍一首歌要24至28小時，如果出埠拍4首，我會唔會一個星期都冇得瞓，不過就可以公費去旅行，都好開心。」