周迅靚到登熱搜榜首惹質疑　網友狂晒生圖揭真相

「三金影后」周迅出道多年演技屢獲肯定，近日周迅出席活動，更谷盡事業線上陣，令「#周迅 50歲正是迷死人的年紀」關鍵字立即登上熱搜第一，明明獲大批網友追睇，但就不被睇好，更有網友揣測「熱搜買得很明顯」，引起熱議。

活動當日，多位網友晒出現場側拍照及影片，可見周迅以一條貼身絕美長禮服現身，上身設計凸顯纖細蛇腰，更見搶眼事業線，加上全身閃片作點綴，望落高貴又優雅，即將滿50歲嘅佢，皮膚更係白皙無瑕，臉上幾乎睇唔見歲月痕迹，難怪一現身就上熱搜。

雖然貼文底下引嚟眾人讚賞「讓人羨慕的身材，真的好美」、「感覺周迅沒有以前那麼乾瘦了，現在這樣蠻好」，不過獲得最多like嘅留言卻係「熱搜買得很明顯」，該留言底下仲有唔少人附和，不過冇幾耐該評論就「被消失」，目前更唔見任何負評。「刪留言」事件發生後，唔少網友即晒出活動當日嘅生圖，亦相繼出現周迅舊生圖或未獲PS嘅路透相，似為Del留言一事反擊。