龍婷被「Hello Kiss」打殘首現身：唔想再提起！

《中年好聲音》歌手龍婷早前被爆出與已婚演唱會製作人丘亞葵「Hello Kiss」，引起全城關注，有傳她因形象受損遭雪藏，事隔一個月終獲「解凍」，今晚（25日）亮相《中年好聲音3》的探班活動，身穿藍色全身裙的她，面容略帶憔悴，對於跟丘亞葵之緋聞，她沒有正面回應，只表示：「件事過咗咁耐，係時候見大家， 因為都過咗去，唔想再提起，好多謝公司嘅諒解，呢個幾月喺工作上都冇乜嘢影響，只係冇做一個騷，呢個幾月都係做番平時假期會做嘅嘢，不停練歌，唔想辜負自己7年嘅努力。」

至於之後的工作安排，龍婷則表示：「等公司安排，呢段時間都有好多朋友關心我，所以我今日行出嚟見大家，希望之後可以唱多啲好歌畀大家聽。（有傳支嚳儀係爆料者？）我冇懷疑過佢，大家見面亦冇尷尬，我哋《中1》生係一個大家庭，大家都好團結。」

早前有自稱是龍婷鄰居大爆她有老公以及有小朋友，對此，龍婷表示：「我2017年出嚟唱歌畀大家聽，一直都冇講屋企嘅事，以後都唔會講，之後都會小心啲，幾熟嘅朋友都會保持距離。」

支嚳儀表示：「同龍婷好耐冇見，大家有傾偈，之前喺群組大家都有問候佢。（有冇就金手指件事同佢解釋？）唔會講呢啲，因為都係假，冇發生過嘅事。（龍婷話好信任你，冇懷疑過你？）大家向來好信任我，有呢啲報道傳出好無奈同無辜。」她大讚龍婷表現專業，上到台即時見到對方有團火，又謂今次再聚有夢回當年比賽時的感覺。

而《中年》學員梁浩銓被傳與曹敏寶有婚外情，有指是支嚳儀煽動「中1生」孤立曹敏寶，梁浩銓今日在另一個活動中開腔，對此，支嚳儀說：「佢之前都有傳短訊畀我，叫我加油，仲話知道我係畀人屈，我同佢講唔緊要，總之中年好聲音一直好團結。（點解經常傳係你？因為你收得最多風？）唔係，我專注事業，每次都努力綵排，冇咁多時間，相信真相始終會大白。」