娱圈单打︱又要睇又要闹　绿茶婊真泶嫪

《Emily in Paris》第四季终于上架，又引来全球一波追剧潮。莉莉哥连斯（Lily Collins）饰演的女主角Emily，终于同大厨型男Gabriel正式搭上，令一众Camille及Alfie粉丝大叹眼冤！老实讲，Emily嘅性格都好“绿茶”啫。

所谓“绿茶”，后面会搭个“婊”字，一听就知冇好嘢。“绿茶婊”意指外貌清纯、看似人畜无害，实际上极工心计、喜欢撬人墙脚或乘机上位的女子。Emily在剧中仿似美国甜心，其实唔止撬咗法国妹好友Camille墙脚，仲将黑人型男Alfie当成备胎，都几乞人憎㗎！

职场上，佢恃住识玩社交网无往而不利，摆出能干模样，多次抢走同事功劳，黑人同事Julien已多次受害！Emily往往一句Sorry都冇，仲要扮到“帮紧你帮紧你”咁款，若然现实中有个咁嘅女子坐你隔篱，都咪话唔难顶。嗱，Emily之所以同华裔嘅Mindy结成好友，系因为二人不在同一职场，恋爱对象亦各有不同，否则Mindy分分钟畀Emily食埋只车！

都系讲番Camille同Alfie，前者在第一季甫登场即令人眼前一亮，一头金发、简约打扮加上甜美笑容，典型法式美女，非常讨好。可惜当她知道Emily同男友Gabriel有一腿后，由原本毫无机心逐渐黑化，连样都衰埋，实在可惜。

都系Alfie襟睇，外貌身形Hold得住。唔系讲笑，Emily固然断崖式衰老，Gabriel身形更加系横向发展。都话鬼妹唔襟老，谂唔到连鬼仔都系一样。