炎明熹於TVB官網「被消失」　觸發離巢疑雲

因離巢風波而遭無綫雪藏的「樂壇小天后」炎明熹（Gigi），早前雙方一直就合約條款拉鋸，更有絕密內容曝光指Gigi要求準時出糧等，亦有傳若佢決心離開娘家，起碼要捱多逾一年「雪藏期」。雖然依家雙方都未有公布續約事宜，不過有網友就留意到，TVB網頁藝人板塊有變動，當中就增加咗簽約歌手部分，炎明熹個名就「被消失」，似乎有傾唔掂數之疑。

於藝人板塊可見，與炎明熹同期嘅大批《聲夢傳奇》歌手都有得留低，炎明熹身在嘅女團After Class成員姚焯菲（Chantel）、鍾柔美（Yumi）和詹天文（Windy）當然亦喺歌手列之中，令人聯想炎明熹有可能已經離巢。尋日（26日）少有見人嘅炎明熹亦上載睇唔到樣嘅唱歌片，佢就自爆前排病咗一直都冇唱歌，疑似暗示冇工開，如今佢再「現身」，翻唱湯令山嘅《緊急聯絡人》，唔知係咪有弦外之音呢？

至於無綫旗下唱片公司TVB Music Group(簡稱TMG)CEO張仲恒對於炎明熹在無綫官網「被消失」再惹離巢揣測一事，他接受訪問時聲稱純屬一場誤會，他說：「係因為公司嘅網頁Update緊，公司藝人同愛爆音樂嘅歌手先放上網啫，唔係冇炎明熹嘅，會遲啲上載，其實如果大家有留心睇，其實連周吉佩，中年好聲音嗰班歌手都未放上網，公司稍後連幕後配音組嘅同事都會擺上網嘅。」問到炎明熹跟唱片公司的合約年期，他謂：「仲有一段時間嘅，（有冇信心留住佢？）合約一路都傾緊，咁傾合約係雙方㗎嘛。」