余香凝無啦啦多個「仔」　主題樂園過二人世界

影后余香凝（Jennifer）與丈夫現時育有一對子女，她落力發展演藝事業之餘，亦不忘抽時間照顧自己的家庭，絕對是稱職媽媽。本身十分喜歡小朋友的她，早前與小演員王瑋程（Desmond）合作演出新劇《麻甩媽咪》，結果一見如故，Desmond更以「Jennifer媽咪」來稱呼余香凝。

開工時曾經問過Desmond「想去邊度玩」，余香凝趁着暑假尾聲兌現承諾，日前相約對方去主題樂園「拍拖」過二人世界！她笑說：「嗰日真係好熱，不過我哋都玩咗5、6個鐘，今次我係特登唔帶自己小朋友去嘅，因為好想同Desmond相處多啲，亦好多謝佢媽咪對我嘅信任。Desmond真係好叻，拍攝時佢真係幫到我進入情緒㗎，希望佢繼續學業進步，同埋遇到多啲好角色啦。」

談到日前她上載囡囡Clare的唱歌片，Clare表現肉緊，唱到最投入時更緊握拳頭。余香凝坦承對方遺傳了自己的表演欲：「我讀幼稚園時都好鍾意報台表演，自己衝上台㗎。依家有畀Clare學唱歌跳舞，想訓練佢嘅自信心，佢又好鍾意喎。」