任達華變身古稀老人　做苦力養活小孩

影帝任達華目前正身在智利拍攝新戲，而其主演的溫情催淚片《我的爺爺》則已鐵定下月中於內地上映。《我》片中他不惜自毀型男形象，「變身」一名古稀老人，劇情更交代他在垂暮之年拾獲一名被遺棄的男嬰，為了養活對方而當起苦力，日復一日用挑山杠搬運貨件到天階盡頭以賺取生活費，「爺孫」二人因而產生一段無堅不摧的感情。

談到今次拍攝難忘事，出名「捱得」的任達華亦不禁謂：「我哋喺泰山開工，泰山又係五岳之首，台前幕後每日起碼行二千多級石級上落，加上條路好窄，等同一對鞋咁闊，名副其實行到上起唔接下氣。拍攝時天氣好凍，又成日刮起強風，有好幾日因為風勢太大嘅關係直情要停拍﹗」

不過由於「登泰山而小天下」，身為山東人的任達華坦言無論如何都值得一去﹕「其實嗰度無論日出、日落、風景及地勢都好吸引，我仲同劇組喺山上住咗3日添。」據悉不少網民及粉絲得悉劇組曾於當地名勝取景，紛紛特意前來打咭「追星」，令當地旅遊業更見興旺，任達華更坦言﹕「相信入場嘅觀眾會俾我哋嘅『爺孫情』所牽引，記得帶定紙巾先好入場，唔好投訴我搞喊你呀。」