港姐︱「鋼琴家」謝淑怡想同馮盈盈合作：冇人永遠係魔音

前港姐冠軍馮盈盈今日（1日）出席應屆港姐候選佳麗的宣傳活動，現場講到最欣賞的歷屆港姐時，盈盈得到（4）謝淑怡垂青，盈盈笑言受寵若驚：「我知佢係一位鋼琴家，得到一位咁有才華嘅女仔肯定，我真係與有榮焉。」謝淑怡透露以前在外國讀書缺乏娛樂，經常看盈盈主持的綜藝節目，從中得到樂趣，後來認識對方真人，覺得她為人真實及很有吸引力，又指盈盈成為她參選港姐的原動力之一，她不諱言希望將來在音樂上有合作，講到盈盈有魔音之稱，她說：「冇人永遠係魔音，只要有心就可以進步。」盈盈表示一直有學唱歌，笑言將來可跟對方學彈鋼琴或樂理。

提到盈盈早前在節目上以素顏上鏡變「無眉娘」，她稱：「我對自己素顏有信心，化唔化妝個輪廓分別不大，我係有眉，只係當日陽光反射下我變咗冇眉，個光線對我唔公平，我下次會素顏拍片畀大家睇。」