戴祖儀病愈即飛越南　擔任黎諾懿私人翻譯

藝人戴祖儀日前眼部患上虹膜炎，不過年輕人康復神速，今日（2日）她便於社交平台晒出數張靚相及相關視頻，且打卡與黎諾懿一齊身在越南公幹，靚日靚景相當chill，難怪2人心情大靚﹗祖儀更留言：「跟大佬搵食日誌。」搞到連吳若希亦不禁回應：「可唔可以幫我買河粉，認真嘅！」

黎諾懿事後回覆表示：「我去年咪做過港姐嘉賓，喺越南拍過嘢嘅？佢哋今年有個電影電視節，咪邀請我囉，聽日會有個揭幕式嘅，我哋嚟支持吓，同埋睇吓有乜可以合作。咁啱獲邀嗰日同祖儀一齊，我就問佢有冇興趣一齊嚟，佢對眼都好番約7成嘞，應該冇乜事。祖儀今次責任重大㗎，因為我普通話同英文都好犀利吓，要靠佢翻譯囉，哈哈。」

祖儀亦不禁回應：「喺越南除咗chill吓外，最享受就係聽黎諾講英文，哈哈﹗呢個係佢魅力所在，聽佢講啲唔鹹唔淡嘅英文，無論3歲定80歲嘅女生都會好開心。」