陳庭欣蔣祖曼大鬥演技　「闊太專業戶」林漪娸霸氣搶Fo

藝人陳庭欣(Toby)於無綫新劇《法證先鋒VI：倖存者的救贖》與林漪娸演母女，二人同被讚演技在線，Toby受訪時表示很開心能有機會向這位「闊太專業戶」前輩偷師：「論霸氣我真係唔夠我媽咪林漪娸嚟。今次係我第一次同佢合作，可能因為佢演得多富裕人家，啲霸氣好勁，所以我都會觀察吓佢點演。我自己就揣摩到其中一樣嘢係，講嘢時最尾嘅語音唔可以拉得太長，簡單嚟講個tone要倔啲，唔可以太多助語詞。」

談到劇中角色，Toby透露原來角色比自己真實年齡年長5至8歲，為了增加角色的霸氣、高貴及成熟感，除了靠化妝及服裝同事幫忙，Toby也自訂「霸氣三寶」增強氣勢，分別是啞色唇膏、不穿上身的外套及超高高踭鞋：「角色用嘅唇膏都係我自己帶嘅，我主要揀咗啲啞色啲嘅唇膏，希望望落去惡啲。同埋啲外套我盡量唔著住佢，而係披住咁行出嚟希望增加到角色嘅氣勢，仲有好高嘅高踭鞋都係必須嘅。」