汪小菲傳被索賠4億人仔　大S矛頭直指張蘭律師：將告造謠者

台灣女星大S（徐熙媛）同汪小菲嘅離婚風波前日（2日）傳出新進展，汪小菲母親張蘭嘅律師稱大S同汪小菲的刑事訴訟雙方均未出庭，係由雙方代理律師到庭去進行庭審工作，更透露大S向汪小菲索賠4億元人民幣（折合約4.3億港元），消息驚人，外界有人就批大S有獅子開大口之嫌。不過劇情再有新進展，大S工作室尋晚斬釘截鐵表示：「假！將對該造謠者採取法律措施維權。」汪小菲、張蘭則未回應。

事實上該位律師並未提出受委託證明，亦未於張蘭委託嘅北京律師所律師名單內，更啟人疑竇嘅係，其直播間主頁係滿滿汪小菲旗下食店嘅商品，身份被網友質疑。此外，網友指出，胡律師又曾聲稱大S喺湖南雇用1,000個水軍被警方逮捕，網友詢問湖南網警，得到回覆為「以官方的警情通報為準」，因此紛紛支持大S用法律維護自身利益，提告胡律師。

不過張蘭就一於少理，開live時僅表示自己前一日去牙科做手術，因為無法咬東西，即炫耀新新抱Mandy要請佢食魚翅，大晒新婆媳關係夠close。