朱潔儀8號波開生日會　好友冒雨祝賀：難忘的一晚

港姐畫家朱潔儀（Donna）昨日（6日）生日，在8號風球懸掛當日獲一班好友，包括黃百鳴、鍾培生媽媽Rita及梁佩瑚夫婦等安排生日飯宴及現場樂隊為她慶生，認真唔話得，Donna對於朋友風雨不改為她慶祝，她表示開心及感恩：「佢哋都好錫我，大家都話貴人招風雨，哈哈！」

Donna坦言初時大家都擔心會有狂風暴雨，但幸好今次風球比預期中平靜，並笑言生日總跟颱風結下不解之緣：「我滿月時亦係8號風球，但係都擺得成滿月宴，但5歲時打8號風，店舖都關門，最後生日蛋糕變成纸包蛋糕慶祝。」

講到生日晚宴，Donna透露由於新曆及舊曆生日只差一天，故她踏正凌晨12時即開香檳慶祝，大家又一齊唱歌助興，度過了開心又難忘的一晚：「所有朋友都好錫我，我唱咗《月亮代表我的心》多謝佢哋，黃百鳴自彈自唱《戀愛預告》，我剛選完港姐出道就喺一個活動上認識佢，佢向來對我好好。」她稱朋友知道她愛打扮，所以送了護膚品、首飾及手袋給她，至於生日願望則是身體健康及大家開開心心。