莊子璇處女劇個個錫　因「爸爸」郭晉安愛上演戲

上屆港姐冠軍莊子璇於周日（15日）港姐決賽便正式卸任，當晚她更會擔任司儀。近排工作不少的她，日前終於拍完她首部參演的無綫劇集《金式森林》，由於劇中不少前輩對她寵愛有加，故她都不忘逐一於社交網感謝。

莊子璇PO了與劇中演員及工作人員開工時的開心合照，更配文:「第一套劇煞科，好感恩遇到呢一家人，呢3個月嘅相處，令大家變成真正嘅一家人。從來冇演戲經驗嘅我，啱啱開始嗰陣真係好緊張，好擔心會拖累大家，好怕唔合群，好驚自己會做唔好，但係你哋畀咗好多力量我！你哋每一個都不厭其煩咁教導我、提點我、包容我，真係好多謝你哋。」

而她首個多謝的是劇中爸爸郭晉安，她表示：「阿爸，你成日叫我哋唔好多謝你，但係我真係喺你身上面學咗好多嘢，你亦都好願意教導我哋，我永遠都唔會忘記嗰一晚，我哋嘅幾兄妹同你嗰場戲！因為...係嗰場戲令我愛上咗演戲，多謝你！」她亦多謝劇中多位哥哥何廣沛、陳浚霆、羅天宇及江嘉敏，她更指每次江嘉敏讚完她之後，她都會暗爽呢！