楊冪獲迪麗熱巴連續第11年發慶生文　孖小鮮肉切Cake

頂流女星楊冪今日（12日）38歲生日，其工作室就上載大批慶生相，見楊冪着上金色新中式秀禾（中國嫁衣）現身，被粉絲大讚似足一朵富貴華麗牡丹花，即被發現係今年秋冬高級訂製服系列刺繡亮片套裝，佢再搭配高級珠寶及女士最愛嘅紅底鞋上陣，難怪令「楊冪新中式秀禾」話題直登熱搜。

圈中朋友多嘅佢，亦獲多位紅星、猛人為佢送上慶生文，當中其「前下屬」、一線女星迪麗熱巴就喺凌晨12點準時向楊冪送上生日祝福，賀一手捧紅佢嘅伯樂生日快樂，呢個亦係佢第11年為對方發生日文，非常有心。內地製片人于正，亦發文為楊冪慶生，仲晒埋當年捧紅佢嘅《宮》劇照，即使係13年前嘅舊相都依然靚靚。而楊冪情同姐弟嘅小鮮肉黃明昊，就送上二人最新生日P切cake相，為粉絲送上新鮮索相。