娱圈单打︱被渣男瞓完即走　我见犹怜大骑楼

阴功猪咯！落选港姐郭珮文（Juliana）凭住一对“大骑楼”成为网民最爱，佢最近为麦玲玲的节目担任嘉宾，讲讲吓又被“Chok”出猛料！伊人自爆冇人追，但语出惊人，直认过去遇过渣男，“瞓完觉就走咗去”！此语一出，迅即成为网民热话！

有人赞“大骑楼”够晒坦白，亦有人批评佢“波大冇脑”，更有好色之徒想入非非，坦言“系男人都想同你瞓”、“好想同你疯狂打羽毛球”！计本栏话斋，唔讲又边有话题吖，难得Juliana唔介意自揭伤心往事，勇敢面对过去曾被渣男“瞓”同“玩”，仲自我安慰话“都学到嘢嘅”。系啦，一世人流流长，梗会碰到几个人渣，经一事长一智，唔好重复犯错做“人渣磁石”就得啦。

话时话，Juliana签约TVB后，可谓万千宠爱在一身，演出机会不断。除咗不时亮相各大小综艺节目，仲率先跑出有剧开，《法证先锋VI：幸存者的救赎》作为其处女作，拍完即刻出街，同届港姐冠军庄子璇都冇咁好待遇，唔恨死隔篱就假！

明乎此，你有你话佢波大冇脑，佢有佢密食当三番！娱乐圈遍地靓仔靓女，要喺圈中生存，Talking Point唔少得。难得Juliana一双豪乳得天独厚，甫出道即话题多多，加上伊人性格傻更更甚有喜感，份人又够晒率直，深得观众欢心，无怪乎TVB锡到佢燶！

嗱，一年容易又港姐。新一届港姐就快诞生，不过“大骑楼”始终只得一个，谁能代替你地位！所以话啫，阿囡唔使愁，唔扮嘢做自己就啱嘞，不过记住唔好咁快同人瞓啦！