吳謹言毫無預警下嫁洪堯　瘋傳奉子成婚凸肚片流出

內地花旦吳謹言早年憑成名劇《延禧攻略》「魏瓔珞」一角爆紅全亞洲，今年再靠新作《墨雨雲間》翻身，人氣再次急升，正當大家以為佢打算強攻影視界爭一姐地位之際，今日（13日）佢同個人《延禧攻略》「和親王」、男友洪堯宣布成婚，仲各自發文：「今日結的」、「今日領的」雙雙晒出領證婚照，消息震撼網友！而二人宣布婚訊僅一小時，就已有2.6億閱讀量，多個熱搜攻佔三甲之位。

吳謹言同洪堯今日剛領證，就已經急急腳同親友食個quick lunch，好友更大爆二人原來已拍拖7年，仲被晒出sweet爆合照，二人頭貼頭，吳謹言又多次洪堯挨落身上，洪堯就用手攬實老婆纖腰，真係又冧又夠閃。

二人公布喜訊後，網上即瘋傳一條指係近期影嘅吳謹言Fans路透片，見吳謹言以間條鬆身Tee襯闊身短褲，腹部微隆，佢行路姿勢更係一拐一拐，即被傳佢係奉子成婚，所以先會結得咁突然。加上于正一同公布好消息時，其發文：「良辰吉日，雙喜臨門，大吉大利，見者隨喜。」尤其「雙喜臨門」令人有所聯想。對此，于正回應表示今日是內地歌手陸虎舉行婚禮的日子，2位好友同時有喜訊，所以是「雙喜臨門」。

《延禧攻略》一劇成名紅遍東南亞，2019年吳謹言同洪堯傳出緋聞後，2020年更被指疑似同居，去年更被爆出「準備備孕」消息，吳謹言老闆于正則第一時間澄清造謠，估唔到一轉眼，二人已領證。

其實當年傳出緋聞後，男方曾上載兩人親密合照，隨後秒刪，加上洪堯過去有被爆劈腿、床照流出、亂丟煙蒂等負面新聞，因此戀情初時不被粉絲看好，如今有情人終成眷屬，可喜可賀。