娱圈单打︱过去式打死唔认　父女恋极速玩完

吓，唔通“父女恋”咁快玩完？“性女港姐”林钰洧（Denice）早前被东网独家踢爆，跟离婚官司未了的富商马清扬挞着，唔止忽然升呢揸靓车住豪宅，仲被拍下“人肉速递”送上门会情郎，驾车到马清扬位于山顶的豪宅，自出自入，交情匪浅。

事发后，马公子虽然锡住伊人，大赞Denice为人纯品，又强调自己单身，同乜嘢人交往都冇问题，但Denice进一步坐实性女形象，仲被贴上拜金标签，加上马清扬前妻钱慧仪明示暗示离婚官司未完，不满有女人送上门，搞到Denice都好尴尬，冇面见人潜水长达数月！

直到日前佢为港姐决赛彩排，避无可避，靓女终须见记者。面对记者追问，Denice“红都面晒”，断然否认同马清扬拍拖，仲死撑话从来冇去过对方的山顶豪宅。喂，有图有真相喎，咁都可以唔认，唔通要呃人，先要呃自己？

嗱，口痕友就估计，二人可能已经极速玩完，既然已成过去式，梗系死口唔认啦，难道“送外卖”馨香咩！都话公子哥儿风流成性，点会为一棵树放弃整个森林吖。虽然马公子年纪大过Denice一大截，但要绑实一个人又谈何容易！马公子前妻够系港姐啦，一样搞到擘面收场。

好彩，青春就系本钱，Denice仲系廿几岁卜卜脆，呢个唔啱咪搵下一个啰，各取所需，都冇咩蚀底嘅。再讲吖，大台正值用人之际，Denice刚刚加入《爱‧回家》剧组不久，倒不如叠埋心水磨练演技，增加曝光率好过。亲生仔不如近身钱，何况系非亲非故嘅男人！