单亲家庭长大！郑俊弘懦弱性格赖阿爸

歌手郑俊弘（Fred）近日到电台受访，大谈新歌《烂好人》，Fred上一首歌《左摇右摆》和新歌《烂好人》同样讲述自己性格上的缺陷，他坦言：“我性格好懦弱，但呢几年好啲，可能年纪大咗，又有一啲经历。”Fred透露自小在单亲家庭长大，故形成他的懦弱性格：“因为我冇爸爸畀我做一个榜样，细个好惊畀人丢低，好惊有日阿爸阿妈会走咗去，由细到大系公公婆婆凑大我，我7、8岁时妈咪组织咗另一个新家庭，呢啲都好影响我同家姐，细个乜都想人开心，会觉得如果你开心，你就唔会离开我，大个都系咁，宁愿你开心，委屈我自己，自己喺屋企唔开心就算。”

直至近两年，Fred才学识保护自己，由“Yes Man”变成“No Man”：“尤其生咗囝囝之后，牺牲自己都冇问题，但依家所有决定都会影响小朋友，亦学识say no，但要练番嚟，由最初唔好意思去讲，都要去讲，其实我即刻畀答案你系尊重你，唔会浪费你时间，反而拖住你仲唔好！”Fred又言早几年无论拍剧还是唱歌都欠缺信心：“个心好挣扎，但要扮OK，我喺台上一刻好自在好开心，知道呢个台系属于我，但一落到台又冇晒，又缩埋喺角落头，所以嗰时好唔开心，尤其之后发生咁多事。不过依家谂番起，又唔会咁唔开心，依家经历囝囝嘅健康更加唔开心啦。觉得以前真系傻，咁少事都唔开心，我个仔嘅病冇药医更加惨，话以前唔开心其实又冇乜嘢。”

Fred如今已慢慢重拾自信，他称最大原因是因为儿子：“我个仔畀我知道未发生嘅事唔使太担心，因为会带畀自己焦虑，个仔有病后我成日谂将来，我死咗之后佢点呢？但喺佢身上我学到享受今日，一家三口开开心心、健健康康就得，唔好再谂将来，可能听日会有药医，或者第时有好多好嘅照顾畀个仔，学识正面去面对，活在当下。”