關曉彤中秋生日鹿晗冧女友　回覆時間洩甜蜜玄機

內地女星關曉彤同頂流男星鹿晗自2017年開始拍拖，一直愛得甜蜜頻頻傳婚訊，雖然未等到二人公布喜訊，不過已被粉絲視為「夫妻」。今日（17日）中秋節，同時亦係關曉彤27歲生日，鹿晗自然識做，凌晨已卡點發文為女友慶生，關曉彤亦卡點喺零時7分回覆鹿晗，原來隱含愛的秘密！

「#關曉彤零點零七分回覆鹿晗#」直奔熱搜，原來二人唔只係相差七歲，鹿晗最愛數字一直都係「7」，二人更係已經拍拖7年，關曉彤亦留言：「2和7都是我喜歡的數字 那麼～希望27的自己帥氣加倍！」難怪網友係咁嗌甜，被兩人甜絲絲心意閃到盲。

而關曉彤亦喺生日晒出一襲金色Low cut裙靚相，品牌以其星座處女座星空流星為靈感，特別為佢本人訂製呢套禮服，裙仔靚靚又有意義，更重要係有晒排面，真係威到盡。