唐嫣宋慧喬米蘭熱聊登熱搜　孔孝真性感絕美登場

內地頂流女星唐嫣日前獲官宣成品牌代言人，一轉眼就見到佢受邀出席米蘭時裝周，唐嫣從出發到進場連換4套造型，享有頂級待遇，正式見人套衫就係品牌2024秋冬系列，深灰連身長裙搭配金屬粗項鍊、耳環等，低調中彰顯奢華貴氣。唐嫣入場後仲與同為品牌代言人、去年憑話題韓劇《黑暗榮耀》再登事業高峰嘅韓劇女神宋慧喬熱聊，中韓美女同框索爆全場，兩人都被網友狂讚狀態超凍齡，傾偈畫面更加登上熱搜。

另一韓劇女王孔孝真亦有現身米蘭時裝周，不過佢就睇另一場騷，同場仲有泰國男神Bright、荷里活男星Jude Law囡囡Iris Law等。孔孝真以草綠長裙配俐落髮型，更以Deep V上陣滲出濃濃仙氣，非常搶眼。