娱圈单打︱畀人闹系大陆鸡　耿耿于怀放唔低

朱朱心里苦，朱朱不说。第一个内地出身的港姐冠军朱晨丽，不经不觉入行已有十多年，最近伊人受访，坦言曾被网民攻击为“大陆鸡”、“大陆婆”，令她很难受，扬言“自己也是有阿妈生的”！哎唷，网民把口唔收，委屈朱朱、委屈朱朱了！

不过朱朱又唔使摆上心嘅，香港娱乐圈就系咁，有新闻总比冇新闻好，畀人闹又总好过提都冇人提。朱朱上位于中港矛盾最激烈嘅时代，加上一出道即传出获大老板特别关照，难免会受到风言风语攻击。以朱朱咁坚强嘅个性，连只身从内地来港瞓板间房都挨得过，网民发噏风又何足挂齿吖，唔使唔开心呀。

所谓柳暗花明又一村，家阵嘅朱朱可谓守得云开见月明。呢，佢同名人史立德之子史昊洺传出拍拖都有一段日子，早前仲传到珠胎暗结，奉子成婚添。不过肚皮系呃唔到人嘅，观乎朱朱依然Fit到漏油，就知大肚系流料嘞。

好事之徒以为朱朱食诈胡，豪门梦碎，之但系朱朱就用行动话畀大家知，你哋谂多咗！佢日前偕好姊妹白云入马场，支持绯闻男友史昊洺爱驹出赛，结果真系“旺夫”过人，成功拉头马！但见佢同史公子大合照时，刻意企到老莲咁远，中间隔着一棚人，似乎想避嫌喎。

朱朱就话，同史公子系“关系不错的男仔朋友”、“比普通朋友再亲近一点”，说来嘴角含春，梗系有啲嘢啦。即系咁，朱朱都36岁，已届适婚年龄，希望搵个好人家“埋单”，都系人之常情。朱朱咁冰雪聪明，只要佢用心经营一段关系，要开花结果怕且唔难，大家就静候佳音啦。