黃曉明被爆對葉珂上晒腦　疑親證女友大肚

內地男星黃曉明因一張中秋節晒全家福嘅合照，引發出同「富貴網紅」葉珂嘅戀事被逼曝光，雖然傳聞一直未停過，去到尋日（19日）黃曉明終於勇敢認愛，公開同葉珂嘅情侶關係，認真Man爆！網友見黃曉明「親認嫂子」，佢哋都去搵二人愛的秘密，當中就搵到原來上月忽然愛上貓仔嘅曉明，專登向明星貓商訂貓，仲講到明「要等一隻最好看的」，以為佢係自己想養，依家大家都明晒，佢係為葉珂而買，繼葉珂晒出過百萬5卡巨鑽戒指後，即被大讚係寵嫂子王者。

同時，網上有爆料者稱黃曉明對葉珂上晒腦，指有朋友同二人食飯時，黃曉明對葉珂百般遷就，仲故意嗌多幾個菜，爆料者表示黃曉明當下就同大家講「我家孕婦要吃這些菜」，又指依家係養胎階段，爆料者更稱預產期係下年。

不過喺尋日黃曉明官宣當晚，葉珂就首露面同閨蜜聚餐，閨蜜言語間大爆兩人早就領證，而合照中葉珂拉鏈位置非常貼身，完全睇唔出「孕相」，似乎就曲線闢謠大肚。

而黃曉明前妻Angelababy，佢喺今個人月兩團圓嘅中秋節，只得佢獨自一人去睇畫展，加上黃曉明尋日嘅官宣，真係顯得分外唏噓。