洪助昇原來有份舞火龍　希望有日做到「龍頭大佬」

中秋節一連三晚的大坑舞火舞盛會吸引不少市民圍觀，負責揮舞火龍的300名猛男當中，竟然發現歌手洪助昇（Aiden）身影，原來他是第二次參加舞火龍，對上一次已經是2015年的事：「相隔咁長時間再玩，自己都好期待，同埋見到依家舞火龍被列入非物質文化遺產，自己好開心去參與呢個盛事。」事源他的朋友每年都會參與盛會，今次朋友邀請他一同參加，Aiden又想在唱歌演戲以外發展新興趣，便一起報名。

火龍全長67米，舞龍者要揮動火龍遊走大坑，絕對是體力的大考驗，所以事前Aiden密密加操：「因為條龍真係唔惹少，要夠耐力同體力，所以之前都去舉啞鈴、跑步，做帶氧運動唔少得。」他還戴定cap帽，以防被香「辣」着頭髮。Aiden表示這次舞火龍的經驗好開心，因為圍觀的市民都十分熱情，會互相打氣，這份團隊精神感覺彌足珍貴。這一次Aiden負責揮動龍身部份，坦言希望有一日成為「龍頭大哥」：「因為龍頭同龍尾要一啲比較有經驗嘅師兄先可以handle到，自己都立志希望未來可以有機會做龍頭大哥去舞龍頭嘅部份。」