娱圈单打︱二世祖够晒传神　偏偏大台唔留人

TVB重头剧《企业强人》开播，以物流业做背景有一定新鲜感，不过现时仍在铺垫剧情阶段，未见特别精彩，反而有演员表现令人印象深刻，嗰个就系饰演嚣张跋扈、声大夹冇准二世祖的“闵大人”谢东闵！

剧中闵大人饰演姜大卫大仔，系一个既衰格又冇料的败家仔，衰到穿完柜桶底叫细佬啃咗佢，平时声大大冇货卖，日前仲质疑老窦私生女龚嘉欣系白撞博分身家。佢一改前作《本尊就位》吕洞宾的道貌岸然模样，在《企业强人》以浮夸演技演绎二世祖，令人耳目一新，非常抢镜。

讲起呢位大眼仔，自2010年参加《超级巨声2》攞梗颈四入行，至今已有十多年，可惜在TVB浮浮沉沉，不受重用，歌唱事业几近荒废，只系间中唱吓剧集主题曲；拍剧又多是行行企企食饭几味，直到2020年女友朱智贤惊爆车震出轨，闵大人不计前嫌陪同女友见记者，大家先至留意到呢位哥仔的存在，仲获网民封为“绿帽侠”，声名大噪。

《本尊就位》作为今年贺岁剧，闵大人首当男一，表现获赞，可惜剧集安排在炮灰档播出，回响不大。女友去年宣告离巢，闵大人今年同样约满离开，一于爱相随，仲开到口恨同女友情侣档搵真银。睇嚟二人真爱经得起考验，怕且好快拉埋天窗啦。

话时话，《企业强人》应该系闵大人的大台告别作，又一个默默耕耘的实力派离巢，观众都不禁思考，点解大台咁难留人呢？唔少艺人做到满腹怨气离开，受重用嘅又唔见得有演技，胶面女又有，醉驾佬又有，观众缘欠奉，你话怪唔怪、奇唔奇？