白鹿生日會跳唱新歌被嘲五音不全　激動爆喊惹人憐

內地花旦白鹿今日（23日）30歲生日，尋晚（22日）佢就大舉粉絲生日會，仲順便跨界舉行新歌首唱會，一開場就全開咪帶埋舞群跳唱新歌《你有沒有看見一隻小鹿》，見佢谷胸賣力熱唱，但畢竟同專業歌手仍有差距，本身已經被笑係「五音不全」嘅佢，生日會期間，佢仲被感動到即場爆喊。如今佢正式「轉行」但不被睇好，仲有人留言：「人家唱歌是要錢，她是要命」，但亦有人為佢打氣，指佢只係想趁生日與粉絲同樂，佢鍾意點唱就點唱。

曾夢想入韓國女團嘅佢，18歲喺媽媽陪伴同下，參加韓國經紀公司SM練習生徵選，但未有被挑中，佢即轉做平台模特兒，努力經營社交平台，累積人氣成為網紅，後嚟被微電影導演邀佢演戲，逐漸擴大知名度，最後加入內地猛料經理人于正旗下公司，依家已經係劇界一線小花，但都冇放棄唱跳夢，發行首張EP。