孔德賢憶參加學界籃球賽慘痛經歷　因1個原因冇得出賽

最近有中學錯過學界賽事報名，引起網民議論，藝人孔德賢對此亦身同感受，身為前學界籃球隊代表的他，原來都有類經歷，他在社交網發文憶述事件經過，表示：「想當年學界籃球4強，當時負責老師放假去咗旅行，然後我哋所有人嘅學界證（參加比賽一定要嘅資格證）漏咗喺佢屋企，冇人去到佢屋企拎，然後我哋連出賽資格都冇，自動被判輸波。嗰年我哋中4，即係大B Grade，可以話係我哋呢班波最齊腳，最集中訓練嘅一年，目標係學界拎到牌，然後因為呢一次意外，我哋連爭獎嘅資格都冇咗。練咗4年，每日放學練波練到天黑，冇數嘅汗水同努力，化為烏有，有時輸波唔係最慘，因為可以輸，技不如人咪再練過，但係因為呢啲原因而令到喪失資格，絕對冇辦法放得低，嗰次係我第一喺球場喊，亦都係唯一一次。」

他續指雖然事後老師有向他們道歉，但他認為這件事並非一句對不起可以解決及原諒，自言當年學界對他們來說是世界的全部。他文末為錯過報名學校的學生講說話：「可唔可以比一次機會佢哋？唔好令佢哋遺憾一世。」