公司所有藝人合約到期唔續約　賈玲張小斐被炒勁齊心

內地娛樂公司大碗娛樂今日（27日）無預警下發布業務調整說明，公司旗下藝人張小斐、許君聰、卜鈺、何歡、張泰維、朱天福、曹賀軍、劉宏祿嘅經紀合約已到期，將不再續約，未來將以一種形式繼續合作。另外，百億票房女星、導演賈玲亦獲宣布唔再擔任公司職務，未來專注於內容創作。換句話說，大碗娛樂所有藝人合約到期不續。

賈玲、張小斐等藝人先後轉發表示：「我們來日方長。」此消息一出，即震撼內地網民，當中佢哋最關心嘅一定係人氣極高嘅賈玲去向，更令「#賈玲不再擔任大碗娛樂職務#」話題登上熱搜。因為消息太突然，網上都流出唔少傳聞，有傳賈玲可能帶所有藝人開一間新公司或工作室，同時亦有好多人大讚一眾藝人「被解僱」後仍表現齊心、體面，祝福一眾藝人可以搵到新路向。