劉詩詩一家三口出巡放閃　吳奇隆一舉動感動網友

內地女星劉詩詩貴人事忙，成日都要開工，鮮有時間陪老公、台灣型男吳奇隆，因而結婚至今屢傳婚變。要踢走傳聞，佢決定身體力行去打假，日前就被內地媒體拍得同吳奇隆帶埋仔仔「步步」出巡，大晒一家三口幸福生活！見二人一同逛商場後，就拖住阿仔齊齊搭車離開。吳奇隆為等阿仔可以多啲時間親親媽咪，就讓出後座位置，自己行去副駕位，即被網友讚佢非常貼心，甘願將父愛留於心中。而劉詩詩就拖住蹦蹦跳嘅「步步」上車，現場仲有助理同保母等同行，為阿仔護航。