娱圈单打︱风水轮流转　姊妹冇情讲

同行如敌国，人人争上位，几老友都冇情讲，何况系咪真老友根本冇人知！嗱，声梦小天后炎明熹（Gigi）自从被指拒绝续约后，就畀TVB掟入大雪柜，同期的声梦老友唔乘势摄位至奇。呢，好似锺柔美（Yumi），近期密密做冇停手，做完港姐表演嘉宾不久，又出席商场活动，仲被指好多Job都系执Gigi二摊。

之不过Yumi就话之你，实行密食当三番。佢话喎，所有工作都系公司安排，最近忙于工作，已鲜有跟Gigi联络。所谓人情纸咁薄，娱乐圈更加系跟红顶白，边有咁多好姊妹吖。何况Yumi不嬲自视甚高，年前曾传出佢不满公司将所有资源集中喺Gigi身上，愤而计划出国读书，只系后来改变主意，留在香港读副学士。

家吓Gigi被迫退下火线，Yumi则备受力捧，仲有剧拍，同邵美琪做两母女，梗系笑晒啦。话时话，Yumi早就被指为跟锺嘉欣撞样，唔知拍剧成绩会唔会有正版咁好呢？

反观Gigi就阴功猪咯，冇工开只能间中在社交网Update近况，做得最多就系踎喺后楼梯唱歌！堂堂小天后，英雄无用武之地，唔惨情就假。呢嗱，外界指出道3年的Gigi同TVB份约仲有排先至完结，TVB眼见投放咗咁多资源喺阿囡身上，梗系唔想轻易放走会生金蛋嘅鹅，于是想再加签长约。Gigi曾要求TVB准时出粮，反映钱绝对系双方拉锯的一大原因，加上Gigi觊觎内地市场，TVB份粮自然满足唔到佢。咁冇计啦，惟有喺大雪柜再坐一会，至于将来个世界系点，就要睇小妮子造化啦。