娱圈单打︱拍套戏都嘈嘈闭　周街都系玻璃心

好戏之人吴慷仁挟金马影帝威名进军中国大陆，签约大陆经纪公司后发文透露心声，扬言“我不再是一个人，我们会一起走这条修练演员的路”。不少粉丝到其脸书留言表示支持，但仍有部分台湾酸民不肯放过，咬实影帝唔放，怒斥“你真的不再是一个人”！讲到好似杀人放火、伤天害理一般，有冇再夸张啲？

咁仲唔止，台媒话大陆小粉红对吴慷仁于十‧一当天只转发“祝福锦绣中华”，不提祖国两字十分不满，甚至跑到孙俪社交网搞搞震，质问点解要同吴慷仁合作拍剧。呢位一姐都费事嘥气，一秒封锁酸民，认真霸气。嗱，翻查新闻，全部源自台媒报道，大陆根本冇提，你话唔系唯恐天下不乱系乜呀？

本栏就唔多明白，究竟吴慷仁到大陆拍戏有乜咁大不了？何解台湾酸民硬系死缠烂打、没完没了？讲到底，咪就系玻璃心作祟啰。喂，大把台湾一线大牌到对岸搵食，好多年前已经开始，以前冇人讲，依家就日日嘈，连讲句“我是成都人”都要被出征，根本就系台湾人失去自信，无法接受大陆崛起啫。

喂，有句说话叫风水轮流转，八、九十年代，一样好多台星过江香港拍戏，例如王祖贤、吴倩莲，皆因当时香港影视发展蓬勃。家阵轮到大陆发围，根本冇咩值得批评。如果台湾够威水，一样可以吸引大陆明星过嚟搵食，系咪咁讲先？

所以啫，吴慷仁唔使灰心，专心演好戏，用表现塞住玻璃心把口就啱嘞。佢在脸书晒出最新相片，阳光从一条窄巷绽放，似系反映自己心境。睇张相好似香港街道，唔知影帝系咪嚟咗香港开工呢？