王君馨自爆有焦虑抑鬱　劲歌热舞老公台下望实

歌手王君馨（Grace）今晚（5日）演出商场音乐会，其父母及外籍老公到场支持，而造型性感的她，在台上劲舞连场时波涛汹涌，赢尽全场掌声，她表示：“今日系爸爸71岁生日，做完骚就一家人食饭庆祝。”

她在台上宣传新歌时，透露去年有焦虑及抑鬱症状，所以更想推出充满正能量的新歌《Get Down》，叫心中的魔鬼“收声”。她接受访问时，谈及早前她疑工作压力爆煲，一度在网上讲到眼湿湿，令网民担心她再被情绪侵袭，Grace表示：“其实去年年尾做完演唱会后，自己已经听到好多话自己冇嘢再做嘅声音，要睇心理辅导，但只系有焦虑多过抑鬱，唔使食药，我有宗教支持，祈祷后就冇事，但呢次出歌前一日，嗰晚凌晨5点几，我又听到话自己做得唔好嘅声音，兼且特别大声搞到我失眠，可能自己畀咗太大压力自己，不过依家冇事。（外界担心你做傻事？）虽然我都会返天家，但一定唔会做傻事，唔使担心我，祈祷同读经文后就冇事，我觉得呢啲系神畀我嘅任务，亦有好多朋友开解我。”又谓开办学校，目的是帮助有情绪困扰或没自信的女生，教导学生要放下执着及压力，她谓：“我睇番佢哋啲眼神有番光彩就知帮到佢哋。”

而VIVA透露月底就入住由师兄张敬轩提供的女子宿舍，再次多谢轩仔为4位成员尽心尽力添置家俬，她们谓：“入住后就唔可以再返自己屋企，因为要拍摄类似真人骚嘅节目，虽然我哋之前喺韩国受训时都一齐住，但今次唔同嘅系，我哋4个冇独立房间，有唔知一张定两张嘅碌架床，所以有啲惊，同埋系冇电梯搭要行楼梯嘅，拍摄几耐同埋间屋有几大都未知。”

问到没有私人空间可感不便？她们又谓：“个节目想营造出好温馨同好幸福嘅感觉，喺呢个屋企度，我哋会玩好多唔同嘅游戏，咁我哋各自嘅碌架床就系自己嘅空间，同埋有间换衫房系就冇摄影机嘅。（异性朋友咪唔方便上嚟坐？）都唔会畀男仔入嚟，始终系4个女仔住嘅地方，约喺出面倾啦。”