娱圈单打︱圆脸变成刀削面　死口唔认有整过

内地新一代顶流花旦赵露思一向以甜美俏皮形象示众，美貌有别于一般“网红脸”，惹人喜爱。讵料小妮子近期露面，容颜大改，原本的可爱圆脸变成刀削面，鼻翼收窄，整个样子跟前判若两人。连一直跟踪偷拍她的狗仔队也慨叹：“赵露思变好多，都快认不出来了！”

之不过，敢整唔敢认向来系娱乐圈定律，男又好，女也罢，明明面目全非，整到阿妈都唔认得，一样打死唔认，当人盲嘅。赵露思一样矢口否认整容，强调愈来愈靓系“自己一点点成长，包括一些努力换来的结果”。咁，何谓一些努力换来的结果？口痕友就话嘞，努力整容都系努力啊！

整容传闻愈演愈烈，思思非常劳气，一方面喊告，企图借此封住网民把口；另一方面又努力出示冇整容的证据。咁即系乜嘢证据呀？继早前佢在镜头前全素颜示范化妆，证明妆前妆后两个样后，最新一招，竟然系在镜头前唧黑头！吓，乜冇整容就唔会有黑头嘅咩？用到呢一招嚟自证清白，实在有啲恶心喎。

计本栏话斋，娱乐圈整容好平常啫，整咗唔认亦大有人在，之但系为咗塞住别人把口，用尽低B方法自证清白，咁就真系好幼稚啰。呃到自己呃唔到人，愈描愈黑又何必呢？

唉，爱美乃系人嘅天性，何况娱乐圈竞争激烈，当红女星精益求精，希望艳压群芳，延长演艺生涯，无可厚非。但得到自己想要的“美貌”，却又妄想别人认同系天生，咁就太贪心啦。虽云家阵医美昌明，但大整之后有冇后遗症，真系讲唔埋。廿几岁骨胶原澎湃，乜都Hold得住，一旦老咗面皮下垂，因住变成夏蕙BB！