衛詩雅拋劍險破相　出席影展獲讚影后級表現

藝人衛詩雅（Michelle）有份主演的英皇電影《破·地獄》定檔11月14日上映，戲中Michelle飾演許冠文的女兒，家族世代從事喃嚤工作，為了在戲中呈現這一重要文化傳承，導演在開拍前就特意安排許冠文、Michelle及朱栢康接受破地獄儀式的訓練。

在最新花絮片中，紀錄Michelle與戲中飾演其哥哥的朱栢康接受特訓，二人不僅要學會手持白幡的技巧，還需熟練掌握破地獄儀式中的多項複雜動作，訓練過程並不輕鬆，許多動作對身體的協調性和力量要求很高，長達九個月的特訓中，Michelle除了上堂以外，亦經常在公園裡和回到家中練習：「最驚係練唔練得切，因為確實好多師傅同我講，佢哋真係練咗成三四年先做到，所以成日反而擔心，夠唔夠時間做到。」

談及訓練期間的挑戰，Michelle 坦言最難的是拋劍，更險些破相：「把劍對我嚟講幾重，試過拋劍落嚟差啲劍尖直插面前，我一手擋住，手爆開咗，依家仲有瘌，如果擋唔切，可能把劍就會落喺塊面度。」她笑稱只有手部受傷經已很幸運：「好彩我反應快，護住咗塊面。」這次意外令Michelle更警惕訓練時的每一個細節。

另一大挑戰，就是背誦大量的經文，因為儀式中需配合經文超度先人，Michelle表示：「劇組拍咗好多經文嘅片畀我前睇，所以返屋企我經常都係聽住經文嚟練習。做gym嘅時候，人哋聽音樂，我就聽超度嘅經文，一邊做運動一邊背誦。返屋企我仲會成日對住鏡子口噏噏，好似念經一樣。」

《破·地獄》未上映經已獲多個海外影展關注，首個出征的就有第44屆夏威夷國際電影節，並於當地舉行世界首映！導演陳茂賢與Michelle日前親赴夏威夷出席電影節一連串活動，原來Michelle此行更是第一次在大銀幕欣賞電影全片，大呼緊張：「好緊張，第一次喺大銀幕度睇，我哋嚟喇夏威夷！今次係我第一次喺大銀幕度睇，因為之前都係喺細嘅銀幕仔睇部份片段，今日喺正式戲院睇，觀感上放大咗多過十倍。」而Michelle亦喜見不少前來欣賞電影的香港人，有種他鄉遇故知的感覺，她指：「頭先最開心就係我見到好多香港人，佢哋話好難買飛呀，其中有一個觀眾話買唔到飛，爸爸都嚟唔到睇，下一場放映都已經滿座。」

二人被問到能否適應時差，Michelle笑言：「我喺飛機冇瞓過，瞓唔到因為太興奮，頭先出發前喺酒店補眠兩個鐘，精神好好，因為仍然喺期待嘅心情入面。」，而導演則指：「夏威夷嘅日落好靚，所以喺酒店望出去不停影相，冇特別休息，影到開始天黑就開始預備好心情，出發同觀眾交流。」導演更笑言內心最擔心Michelle首度睇全片的反應，他說：「呢部戲係需要喺戲院睇，觀感上會好唔同，我比較擔心Michelle睇完戲馬上要做Q&A承唔承受到。」