娱圈单打︱忽然变成韩星风　男人老狗也整容？

电台DJ森美早前偕老婆到日本旅游，本来非常Sweet，点知酒店订房中介收晒钱，去到酒店都话冇房，险些儿要“7街瞓”。好彩森美人面广，最终有朋友帮佢搵到房，虽然佢话间房古古怪怪，怀疑死过人，但有惊无险，总算平安度过。

事后大家都好惊讶，乜经中介平台预订酒店，都会在临尾一刻被取消嘅咩？都真系几冇生意道德喎。森美就话，房间由老婆预订，都感激老婆安排，惟有下次出门旅行前，再亲自传email问清楚酒店啦。言下之意，系咪怪老婆大头虾？

讲咗咁耐，本栏最想讲嘅系，因乜解究森美大哥愈来愈靓仔㗎？都已经“五十而知天命”咯喎，皱纹都唔多一条，加埋韩风新发型，简直就系一个型佬！有人觉得佢似AK，又有人话佢似韩星郑雨盛，唔通森美大哥同其他女星一样，精益求精整容去？

嗱，唔系本栏先有呢个疑问，森美早前大晒佢同小仪一张陈年合照，距今足足22年，相中人系就系同今日一样高大，不过样子远远不及今日Sharp醒精致，就连草蜢的蔡一杰都留言质疑森美整咗容！旧年佢又因为个鼻被指愈来愈高，网民怀疑佢打咗针或动咗刀，森美则澄清只系鼻膜发炎喎，唔知两者有乜关系呢？

当然，减咗肥、箍咗牙、再操吓，外形点都会有改善，何况家阵医美昌明，变靓仔靓女话都冇咁易。话晒都系食面口饭，森美大哥对外形有要求，一啲都唔出奇。话时话，森美做主持够晒盏鬼，之但系今铺险些流落街头，又开Live又在电台讲，就畀网民话佢喋喋不休似八婆！吓，咁都得？