謝安琪婆媳關係融洽　行善帶埋奶奶出動

藝人謝安琪（Kay）偕細女Kakaball以「母女檔」姿態齊行善，擔任「小Q慈善大使」為導盲犬賣旗籌款，拖住導盲犬落九龍區的她，沿途表現興奮，不停揮手和路人打招呼；而Kakaball有狗狗同行，更加充滿力量，頻頻向市民募捐。原來她要照顧囡囡之餘，仲要關照埋擔任義工的奶奶，可見婆媳關係融洽，老公張繼聰絕對沒有做「夾心人」的煩惱。

Kay接受訪問時表示：「因為奶奶都好鍾意狗，所以報埋名做義工，今朝大家一齊着住大會Tee去賣旗。」她又說一向支持導盲犬的慈善機構，之前曾到訓練中心跟導盲犬互動，亦為該機構拍過宣傳片，但和狗狗齊賣旗還是首次：「第一次拖住導盲犬去公眾場所，啲狗狗真係好乖、好醒目，好似去到商場嘅扶手電梯位，佢哋會停一停，等埋我哋先再行，好似帶住我哋行街咁，同導盲犬一齊，感覺好安心。」

至於Kakaball的表現亦令她安慰，皆因賣旗前一日，和囡囡到主題樂園玩到晚上，但囡囡依然可以朝早出發：「佢好準時起床，覺得個女好責任感，我哋都係第一次一齊賣旗，所以覺得今次活動好有意義。」