阿爾柏仙奴自傳爆童年陰影　鐵欄玩踩鋼線跣腳整傷下體

電影《教父》（The Godfather）系列美國男星阿爾柏仙奴（Al Pacino）最近推出自傳《Sonny Boy》，自爆一個童年陰影，他10歲住在紐約時，曾在鐵欄上玩踩鋼線，那天早上下完雨，四處非常濕滑，他在欄上一跣腳，下體就直接撞到鐵欄，令他痛不欲生，無法回家。其後有一名老先生好心將他扶到姨姨家中，他家人連忙叫醫生前來檢查他下體是否被撞爛。

阿爾繼而表示：「我瞓喺床上，條褲除到落膝頭，我生命中3個女人，我阿媽、我阿姨同我婆婆，好驚咁一路篤我條陰莖。我一路聽佢哋一路細細聲咁同對方講檢查嘅結果，我就喺度諗，天呀，畀我死咗去啦。好彩我條嘢同個童年陰影一樣，繼續存在，直到依家我諗起都會驚。」